Lorena Gallardo | 3 de xullo de 2019

Na vida hai momentos verdadeiramente máxicos. A chantadina Sandra Sánchez viviu un deses intres de enerxía a pasada fin de semana cando fotografou o mítico raio verde do Sol dende as illas Cíes. Estaban alí, en clonfluencia, as súas grandes paixóns: o mar, o solpor e a fotografía.  E tiña que pasar.

En realidade esta mestra e fotógrafa afeccionada recolleu, disque por casualidade,sen apenas equipo e en modo automático, un dos momentos máis buscados polos fotógrafos do horizonte. Falamos dun fenómeno óptico  que adoita ocorrer xusto antes da saída do sol ou xusto ao remate da posta do sol e que é visible durante apenas un ou dous segundos. Teñen que darse as condicións para observalo, non é nada doado, pero máis aínda para captalo coa cámara. Debido á súa fugacidade e espectacularidade, o raio verde está rodeado de misterios e de mitos ao longo do mundo e é, por exemplo, o argumento dunha das novelas de Julio Verne.