A paisaxe cultural da Ribeira Sacra xa é BIC
Ribeira Sacra
9 Xaneiro 2019
Cultura
Redacción | 9 de xaneiro de 2019
A Ribeira Sacra xa é Ben de Interese Cultural pola súa
paisaxe cultural. O singular concepto
baséase, a grandes rasgos, nas características dun «lugar identificable por un
conxunto de calidades culturais materiais e inmateriais singulares, obras
combinadas da natureza e o ser humano, que é o resultado do proceso da
interacción e interpretación que unha comunidade fai do medio natural que o
sustenta e que constitúe o soporte material da súa identidade».
A Xunta de Galicia pechaba o ano 2018 coa declaración
oficial deste territorio como BIC. O 27 de decembro foi aprobado o decreto polo
Consello da Xunta; o 28 celebrouse en
Pantón un acto institucional de apoio á candidatura da Ribeira Sacra para ser
declarada Patrimonio Mundial da Unesco e o 31 de decembro o Diario Oficial de
Galicia publicaba o decreto que contén os detalles desta declaración, as normas
de protección ás que se someterá o patrimonio material, inmaterial e paisaxístico
e as delimitacións territoriais con distintos graos de afectación entre moitos
outros aspectos.
Deica aquí os feitos -que, seguramente, mudarán nun senso ou noutro o xeito de desenvolvemento deste territorio- e dende aquí as distintas interpretacións do decreto, o que sobra, o que falta, as futuras aplicacións, as eivas, as fortalezas e o debate en torno ao futuro turístico, económico, cultural, social e demográfico da Ribeira Sacra. Queda moito do que falar.
Concello
Ribeira Sacra