Redacción | 24 de xullo de 2019

Estes días descubrimos que o municipio da Peroxa é un dos lugares máis auténticos e singulares para vivir a Ribeira Sacra. Paraxes emblemáticos coma a localidade dos Peares, cruce de camiños, de ríos e de territorios, rutas sendeiristas de pura beleza case salvaxe, un contundente patrimonio monumental civil repartido entre pazos e castros que son pegada do pasado máis esplendoroso e tamén do máis remoto. Tamén arquitectura relixiosa xunto a recunchos máxicos para o lecer en calma son o inicio dunha viaxe que sorprende. Os mercados e feiras mensuais- coma o da vila ou o de San Ciprián de Pitón-, o viño  da ribeira propia e unha gastronomía que ten por primeiro prato a famosa carne ao caldeiro veñen marcados pola calidade e o selo local. Galicia interior, vida e economía rural e do agro conectada, ás veces, por vías férreas, pontes  e camiños de tradición coma o que conduce ao alto do Castelo da Peroxa ou ao alambiqueiro que resiste dende o oficio. Teatro inclusivo con espazos para o lecer veciñal e momentos de cotidianeidade tranquila definen un paseo cheo de contido profundo, de lembrazas e de contacto coas xentes,o mellor valor do territorio.