A presentación do libro ‘Portela Valladares: Ante el Estatuto’ no castelo de Castro Caldelas foi o pasado 27 de outubro un xesto de reivindicación desta figura política e do seu papel na defensa do Estatuto de Autonomía de Galicia do ano 1936, que fora plebiscitado pero non promulgado polo estourido da Guerra Civil.

O seu autor é Manoel Carrete Rivera, quen participou neste evento impulsado polo Presidente do Parlamento de Galicia, Miguel Ángel Santalices, e que foi acollido dende o Concello coa intervención da alcaldesa Sara Inés Vega. Tamén interviñeron o vicepresidente da Deputación de Ourense, Rosendo Luis Fernández e o secretario xeral de Política Lingüística da Xunta, Valentín García.

‘Ante el Estatuto’ é o título da obra de Portela Valladares na que se recollen parte dos seus discursos en defensa do galeguismo e cuxa portada fora debuxada por Castelao. Precisamente un destacado discurso fora pronunciado en xullo de 1932 no Centro Galego de Barcelona, entidade que edita esta publicación e na que foi figura fundamental o caldelao Manuel Casado Nieto despois de mediados dos anos 50.