Agora chega xa o VI Concurso de Proxectos Empresariais Semente Ribeira Sacra coa idea de seguir habilitando respaldo e axudas a través da colaboración da iniciativa pública e privada. O Concurso que premia a inciativa empresarial contará con 20.000 euros en premios. Un primeiro premio de 10.000 euros, segundo de 7.000 e terceiro de 3.000 euros. A presentación de ideas comezou o 1 de xaneiro do 2020 a través da web www.sementeribeirasacra.org e remata o 16 de febreiro. A entrega de premios será o 9 de maio. Pode presentar a súa proposta calquera persoa cunha idea empresarial que dinamice o territorio. As bases do Concurso  están na web www.sementeribeirasacra.org.

Os obxectivos están na aposta polo talento e a dinamización da economía dende un prisma que teña en conta a “identidade territorial”, a dixitalización e a sustentabilidade, tal e como sinalou o conselleiro de Economía, Francisco Conde, no lanzamento da presente edición. Premiaranse as ideas innovadoras tendo tamén en conta a oportunidade que supón para o territorio a candidatura a Patrimonio da Humanidade e Reserva da Biosfera.

Os proxectos para este Concurso poden vir de calquera lugar, pero faise un especial chamamento a aqueles vinculados ao territorio da Ribeira Sacra. O Alcalde de Sober, Luis Fernández Guitián, como Presidente do Consorcio de Turismo da Ribeira Sacra, referiuse á importancia de que este proxecto se abra a toda a Ribeira Sacra.