Os traballos serán  realizados pola empresa forestal Foresga e supervisados pola empresa Árbore  Arqueoloxía e Restauración. Esta iniciativa ten detrás ao Concello xunto á Asociación de Veciños de Salcedo e a Comunidade de Montes. Xa ten implicada e conectada á veciñanza desta localidade, habitualmente unida en eventos de tradición e cultura dos que tan só un exemplo é o Entroido, O Oso e o teatro popular. A intervención está enmarcada no proxecto Penas do Castelo que se define como de  arqueoloxía de aldea

‘O control arqueolóxico garante que o xacemento non sufra danos durante a roza,’ comenta Benito Vilas, arqueólogo. ‘Grazas a esta limpeza comprenderemos mellor  este xacemento, polo de agora bastante enigmático, así como as súas dimensións e  límites.’

Tal e como aparece na ficha de catalogación, pola súa forma e tipoloxía o máis  probable é que se trate dun xacemento altomedieval e non se descarta que teña unha  orixe anterior, na primeira Idade do Ferro. O xacemento presenta un sistema defensivo monumental e moi visible, ademais está  nunha situación privilexiada sobre o río Lor con magníficas vistas da paisaxe.

‘Este sitio é un recurso de gran interese na rede de recursos arqueolóxicos visitables no  noso Concello, polo que este verán xa estará incluído no circuíto de visitas guiadas’,  comenta o alcalde, Xosé Lois Maceda.

O proxecto vén de publicar uns vídeos nos que os veciños falan do que consideran o  elemento patrimonial máis importante da aldea para cadaquén. Os vídeos continuarán  a publicarse nos perfís de Facebook (@penasdocastelo) e Instagram (@penas_do_castelo).

Máis alá da roza e o traballo audiovisual cos veciños, están previstas outras accións e  actividades didácticas. ‘Trátase de crear dinámicas comunitarias a través da arqueoloxía,’ comenta Marisa Defente, veciña e membro dos colectivos veciñais.