No acto de entrega do certificado —ao que tamén asistiu o delegado territorial da Xunta en Lugo, Javier Arias—, Manuel Heredia, presidente de Galicia Calidade e director xeral de Comercio e Consumo da Vicepresidencia segunda e Consellería de Economía, Empresa e Innovación, salientou a aposta de Finca Míllara polos “viños de calidade, mediante a produción sustentable”, sen herbicidas e vendima manual para obter o mellor dunhas viñas situadas en ladeiras cunha pendente do 50%.

Coa incorporación de Finca Míllara Galicia Calidade suma 18 adegas certificadas, ás que hai que engadir outras 120 empresas doutros sectores como a alimentación, a hostalería, o lácteo ou a xoiaría, entre outros. En total, son máis de 400 produtos e servizos avalados.

Finca Míllara é un proxecto empresarial que abrangue tamén a restauración, a produción de aceite de oliva ou as conservas. Naceu no ano 1999, cando os seus promotores decidiron recuperar as antigas plantacións e comprar viñas aos viticultores da contorna. Na actualidade conta con 21 hectáreas de cepas, situadas en ladeiras de lousa cun desnivel do ata o 50%. Producen 70.000 botellas e plantando novas cepas para incrementar a súa capacidade dentro da Denominación de Orixe Ribeira Sacra.

Galicia Calidade certifica os produtos e servizos que, pola súa elaboración en Galicia, pola súa materia prima e o seu proceso de produción, cumpran os requisitos establecidos polo selo de garantía.