Luarada, volve ao cinema a negra historia de Romasanta, dende Esgos
Así o quere achegar Luarada, o filme dirixido polo ourensán
Óscar Doviso cuxa primeira fase se rodou durante a primeira quincena de marzo no
municipio de Esgos.
Esta nova versión da atraente historia estreará o seu avance
precisamente esta fin de semana na 25ª edición do OUFF, o festival de cinema de
Ourense. Exhibirase como peza de clausura deste certame esta fin de semana unha
montaxe da mediometraxe que servirá como avance da película. Doviso sinala que
esta peza fílmica en proceso estará “ ateigada de respostas e sorpresas visuais
e argumentais”.
O filme contará a historia dende que Romasanta fuxe de León
e regresa a Galicia, en 1844, ata que é apresado na localidade de Nombela (Toledo),
en 1852. A trama non desbota o relato da xuventude do protagonista, fundamental
na construcción do carácter deste personaxe “ que se aproveitaba da xente
confiada, vítimas a quen prometía unha vida mellor na cidade, e que en moitas
ocasións desaparecían por sempre sen deixar rastro”, apunta o cineasta.
A figura de Romansanta está presente, con máis ou menos
tabús, no imaxinario rural desta zona da Ribeira Sacra ourensá e forma parte do
relato histórico que se vai trasladando xeración tras xeración. Sen ir máis lonxe, as
nenas e nenos de Esgos, con quen realizamos hai uns meses o obradoiro
audiovisual #ConectandoTerritorio, dende Airoá Comunicación e a Canle Ribeira
Sacra coa colaboración da Deputación de Ourense, son capaces de relatar o que escoitaron
deste seu veciño ancestro e de sorprenderse cos sucesos que aínda vibran no seu
territorio. Contos de medo que non son conto:
En Luarada o actor que interpreta a Romasanta é Marcos
Vázquez, cuxa semellanza física cos retratos que se coñecen do terrorífico
protagonista “ asombra”, apuntou o director do filme. No reparto está
acompañado de Helen Bertels e Patxi Bisquert xunto con actores locais como Héctor
Martínez, José Manuel Mao, Candela López ou Lucía Rodríguez.
A equipa está integrada tamén polo director de fotografía Adrián
González, o engargado do vestiario de Carlos Rodríguez, a dirección artística
de Ángel Amaro e a música de Álvaro Iglesias e Tor.
O adianto da mediametraxe no OUFF será un valioso xeito de
promocionar este proxecto, tal e como quixo valorar o director Óscar Doviso,
para “amosar parte do proceso creativo e artístico co que se está a traballar á
espera de continuar e conseguir convertelo nunha longametraxe duns 135 minutos”.
Aquí vos deixamos o primeiro teaser de Luarada: