Novos pasos na candidatura da Ribeira Sacra como Reserva da Biosfera
Ribeira Sacra
24 Setembro 2019
Patrimonio
Redacción | 24 de setembro de 2019
A candidatura da Ribeira Sacra e as serras do Oribio e O Courel será presentada ante a UNESCO antes de finalizar este ano 2019. A Xunta salientou que foron recibidas dúas alegacións no proceso de información pública e, se todo vai adiante, o territorio sería declarado a sétima reserva de Galicia no ano 2021.
A Xunta comunicoulle neste día aos menbros do Comité español do Programa MAB (Home e Biosfera) da Unesco que antes de que remate o ano se lle presentará oficialmente a candidatura da Ribeira Sacra como a sétima reserva da biosfera de Galicia. Trátase da proposta que inclúe as serras do Oribio e do Courel e segundo comunicou a directora xeral de Patrimonio Natural da Xunta estanse a concluír os informes derivados do proceso de información pública, que se abriu o pasado 9 de agosto e xa está pechado. Os plans da Xunta pasan por obter a declaración para o ano 2021. Aglutina a un total de 23 concellos de Lugo e de Ourense. En total recibíronse dúas alegacións. Galicia conta nestes momentos con seis reservas da biosfera -un dos recoñecementos de carácter internacional máis importantes en relación coa conservación e o uso sustentable do patrimonio- que representan arredor do 25% do territorio da comunidade. Coa incorporación da reserva da biosfera Ribeira Sacra e Serras do Oribio e Courel, a extensión protexida en Galicia baixo esta figura se incrementaría ata chegar ao 34% do territorio. A zona proposta abrangue os concellos de Bóveda, Carballedo, Chantada, Folgoso do Courel, O Incio, Monforte de Lemos, Pantón, Paradela, A Pobra do Brollón, Portomarín, Quiroga, Ribas de Sil, Samos, Sarria, O Saviñao, Sober, Taboada e Triacastela na provincia de Lugo. Na provincia e Ourense están os de Castro Caldelas, Nogueira de Ramuín, Parada de Sil, A Peroxa e A Teixeira. As Montañas do Courel teñen dende hai uns meses a declaración de xeoparque,o primeiro de Galicia. O recoñecemento da Ribeira Sacra como Patrimonio Mundial sería un proceso paralelo, independente do de Reserva de Biosfera.
Concello
Ribeira Sacra