Ademais do Museo, o artista ten previsto acondicionar un obradoiro para poder traballar nas tempadas que pasa en Sober, xa que reside fóra da zona, así como contar con diferentes espazos colaboradores nos que amosar a súa obra, relacionada directamente co rural  e coa Ribeira Sacra.

Segundo informaron dende o Concello de Sober, o impulsor deste proxecto sinalou que “ se trata de poder pintar aí e traballar no concepto de aldea global desde o lugar no que nacín. Desa maneira o traballo que se faga servirá como resonancia de Gundivós e de Sober”.

Recoñece que é un proxecto “ambicioso” que reúne arte, ciencia e sustentabilidade co que non só expoñer, senón educar e informar sobre as posibilidades do mundo rural.

O pintor, natural de Gundivós, está afincado en Madrid e a súa obra pictórica ten sido exposta por todo o mundo. Na actualidade prepara unha exposición no Museo Nacional de Ciencias Naturales de Madrid titulada ‘Arte y Ciencia’.