'Pandemias', pola historiadora Tamara González
Mesma tendencia de calma e redución de enfermos que
transmitían as breves referencias dos días seguintes, aludindo á recuperación
de persoas destacadas como a infanta dona Isabel ou o conde Romanones, ministro
no momento de Gracia e Xustiza. Mais, ao mesmo tempo, outras novas e outros
medios ían dando outra perspectiva da magnitude da epidemia ao clausurarse escolas
en Valencia e ir chegando noticias doutros puntos sobre o incremento dos
enfermos.
Nin na provincia de Lugo nin na comarca houbera aínda algún
caso (ou que se soubese) e a vida seguía o seu curso. De feito, o 21 de xuño
publícanse as festas que se ían a celebrar entre o 6-9 de xullo na honra de san
Antonio, que incluía concertos da banda municipal, pasacalles da banda con
xigantes e cabezudos, carreiras de bicicletas, folión, misas e procesións,
bailes, iluminacións e pirotecnia, batalla de flores; así como outros elementos
menos enxebres como “fengós japoneses y globos grotescos” e outros tan actuais
como “concurso de escaparates ou “festival gallego” no souto de Pousada con
premios ao mellor viño ou ao posto de ‘rosquillas’ mellor adornado. Tamén outros
dignos de ser resucitadas como o premio ao cego que mellor executase ‘Aires Gallegos’,
á parella que mellor bailase a muiñeira e á que mellor traxe do país vestise.
Efectivamente, a enfermidade estába a reducirse: en xuño de 1918
faleceron oficialmente en toda España 2.214 persoas por gripe, 1.598 en xullo e
só 895 en agosto. Mais só era a calma antes da tempestade: en setembro
faleceron 7.090 persoas, 71.504 en outubro, 37.937 en novembro e 8.915 en
decembro. Dado que descoñecemos os indicadores que se empregaron na diagnose, non
podemos aseverar que os
falecidos por pneumonía fosen realmente por gripe, pero coinciden en ser
outubro e novembro os meses de maior letalidade (3.390 e 1.840,
respectivamente). Dos sete mil mortos anuais por gripe nos anos anteriores
pasouse en 1918 a 147.060 mortos.
Deles, 3.625 foron de
Lugo, a menos
afectada das provincias galegas
(A Coruña 7.763 mortos, sendo a cifra máxima
de España nese ano, Pontevedra 3.805 e Ourense 5.211) e a décimo sexta a
nivel de España. Sinal da letalidade desta enfermidade é que estas defuncións
se concentraron nuns meses, xa que non foi ata pasado o verán que chegou a
Galicia.
Os falecidos por gripe na provincia de Lugo no mes de setembro foron 77, poderíanse engadir os falecidos por outras enfermidades relacionadas co aparato respiratorio como bronquite (73) ou pneumonía (41). Eran cifras superiores á media, pero aínda se icrementarían máis. Implica que o groso dos máis de tres mil seiscentos falecidos en Lugo por gripe en 1918 acaeceron no mes de outubro e novembro. Sen dúbida algunha, foi esta vaga da enfermidade, a de outubro-novembro de 1918, a que máis afectou á zona sur de Lugo.
En toda Galicia, os feitos fóronse sucedendo con moita
rapidez. O 20 de setembro de 1918, a cidade de Pontevedra iniciaba o saneamento
dos que consideraba posibles focos de infección
en previsión de que invada esta ciudad la epidemia gripal; e constátanse
a existencia de enfermos nos destacamentos militares de Ferrol e Ourense. O 23
de setembro, Vilalba foi declarada epidemiada con parroquias contaxiadas
na súa
totalidade. O 28
de setembro infórmase que
Universidade de Santiago suspendía indefinidamente a súa apertura para evitar a
difusión da enfermidade. O tres de outubro rexístranse casos en Mondoñedo; o
catro de outubro recóllese nos xornais que Vilalba era un dos lugares con máis
contaxiados, malia que xa había un descenso. O sete de outubro suspéndese a facultade de emigrar por real
orden do ministerio.
O 16 de outubro de 1918 especifícase que en Lugo, Chantada,
Ribadeo y Sarria segue en aumento o
número de contaxiados. Ao día seguinte,
a situación en Viveiro mellora, “pero no puede decirse lo mismo respecto de
Chantada. Allí el número de atacados es grande y el de defunciones
relativamente crecido”. O día de san Lucas, o 18, “en Chantada y Bóveda
aumentan las defunciones” e outro xornal situaba Chantada como unha das catro
zonas con maior número de contaxiados. O incremento de enfermos aínda
continuaba o 26 de outubro.
A situación era tal que o 24-25 de outubro visitaron
Chantada con motivo de la epidemia o
bispo Basulto, o gobernador Civil Alberola e o inspector provincial de sanidade,
don Emilio Domínguez; os dous últimos, amáis de levar medicamentos e
desinfectantes, doaron duascentas pesetas cada un para o socorro dos pobres. Aínda que, atendendo ao publicado
no diario El Norte de Galicia, a doazón do gobernador civil non tiña moito
mérito, xa que proviña da suma para tal efecto remitida polo ministerio. Esta
visita permite saber que xa non era a vila a zona máis afectada, senón que a
gripe chegara ás aldeas inmediatas nas que estaba causando estragos.
Non foron as únicas doazóns que se recibiron, malia que a
meirande parte quedaron no anonimato e no esquecemento, algúns por vontade
propia, pois decidían asinar como “una devota
ou un vecino” . A doazón que máis
se difundiu, tanto polo que implicaba ao doador como polo efecto chamada que se
pretendía, foi a de don Leonardo Rodríguez Díaz, alcalde da propia vila de
Chantada e deputado nas Cortes. Segundo ‘El Regional’, encabezou a subscrición “con destino al socorro de los
enfermos pobres de dicho municipio, víctimas de la epidemia reinante” con
cincocentas pesetas; tras el, sumáronse máis. O propio xornal desfíxose en
grandes loas cara el: “una prueba más
del verdadero y acendrado cariño que el celosísimo diputado a Cortes por Chantada
profesa a su distrito que recibe hoy conmovido tan valioso donativo gracias al
cual podrán tener pan y los medicamentos más precisos los pobres de aquella
castigada villa que pronunciarán con veneración el nombre del caritativo
donante”.
En novembro a situación parece que mellorou ao reducirse o
número de contaxiados e só se localizaban focos en diversas parroquias do
interior lucense. Reactivouse a sociedade, a economía e a mobilidade, xa que
entre outras medidas volvéronse a autorizar –con restricións as emigracións e a
actividade académica a partir de xaneiro. Con todo, ata o 10 de xaneiro de 1919,
non se declarou no epidemiados aos concellos de Carballedo, Chantada, Taboada e
Monforte, entre outros, namentres o resto permanecía baixo tal condición de
epidemiados.
Mais a tranquilidade non durou moito na provincia e xa a
finais de febreiro, o Diario de Pontevedra reproducía unha breve mención, case
telegráfica, á chegada da gripe a Lugo: dicen de Lugo que se ha reproducido
allí la gripe. Se cree que la trajeron los quintos que han llegado estos días.
En el hospital hay numerosos atacados habiendo ocurrido algunas defunciones. Dende
logo, non acadou as cifras de outubro de 1918, pero as novas vagas da gripe si tiveron
un impacto forte na provincia de Lugo. De feito, en 1919, a provincia de Lugo
foi a segunda máis afectada de España por gripe, con cifras próximas a Madrid:
1092 falecidos en Lugo fronte a 1477 en Madrid, e por encima das 494 de
Ourense, as 388 de A Coruña ou as 184 de Pontevedra. Se ben é certo que estas
cifras hai que tomalas con cautela pola máis que posibles omisións de
falecementos e da súa causa por mor do desbordamento do momento e da imposibilidade
de achacalo á gripe, non deixa de ser sinal do impacto que tivo a enfermidade
na provincia. Mostra desa dificultade da diagnose e dun rexistro actualizado e
sen duplicacións é o baile de cifras do número de falecidos por gripe no mes de
outubro proporcionados polo Instituto Geográfico y Estadístico: as aportadas en
xaneiro de 1919 situounos en 79.484, mentres que a cifra reflictida no Anuario
Estadístico de 1918 é de 71.504.
No municipio de Chantada, a poboación decaeu de 15.010
habitantes en 1910 a 13.541 en 1920. Non significa que a diferenza fosen os
mortos pola epidemia de gripe de 1918, senón que a
epidemia tivo un
intenso impacto na
estrutura demográfica que
non conseguiu estabilizarse nin
recuperarse a curto prazo: en 1930, a poboación seguía a estar por debaixo dos 15.000
habitantes.
Tamén Carballedo tivo un descenso importante nos seus habitantes:de
9.068 habitantes en 1910, trala gripe pasouse a 8.234. Agora ben, ao partir dun
monto de poboación máis reducido e ao ter unha dedicación agraria maior, a
recuperación foi máis doada e xa nos censos de 1930 recuperara os nove mil
habitantes. Pantón apenas perdeu poboación, xa que pasou de 12.407 habitantes
en 1910 a 12.279 en 1920. Mais, ao contrario que Carballedo, non houbo recuperación
demográfica a longo prazo, xa que a caída demográfica foi a tendencia constante
ata a actualidade, cun único período de incremento na década 1930-1940.
Taboada, pola contra, foi das que menos sufriu a epidemia e
as súas consecuencias demográficas, incluso aumentou lixeiramente a súa
poboación: 7.821 habitantes en 1910 e 7.904 en 1920. Amais, resulta
sorprendente porque a década anterior, 1900-1910, fora de descenso de poboación.
Semellante situación aconteceu no Saviñao que incrementou os seus efectivos demográficos
nunhas setenta persoas nesa década, ao pasar de 11.138 habitantes en 1910 a 11.207
en 1920.
Estas cifras amosan que, ao igual que no resto de España, as
zonas máis afectadas foron as que presentaban características urbanas no senso
de aglomeración de poboación. Sería preciso, ademais, analizar o reparto da poboación en
función da idade, xa que a recuperación
demográfica era máis
complicada e precisaba
de máis tempo
naquelas zonas nas que
a letalidade da epidemia afectara aos habitantes en idade fértil.
Non é posible tratar a gripe de 1918 na zona de Chantada sen
citar a don Benigno Ledo, coñecido como o cura das abellas. En 1919,
concedéuselle a cruz de Beneficencia de primeira clase por las muestras de sacrificio y abnegada
caridad cristiana que durante la última epidemia gripal dio. Segundo o xornal,
foi proposto polo concello de Chantada a petición del vecindario. Condecoración que lle impuxo don Leonardo Rodríguez
tras a procesión das festas do Carme de 1920.
A epidemia de gripe de 1918 e a epidemia actual non só
coincidiron en amosar aos heroes que estiveron en primeira liña de traballo;
senón que tamén houbo quen aproveitou a situación para sacar a súa vea máis
imaxinativa e picaresca. Diferentes comercios de xéneros diversos aproveitaron
o tema da epidemia para sacar maior rendemento. Así, en ‘El Ideal Gallego’ podían lerse anuncios que afirmaban que “para combatir la epidemia reinante [...] no hay como
abrigarse con los gabanes” que vendía certa xastrería. Outros anuncios
emulaban aos artigos periodísticos para
divulgar a venda de produtos farmacéuticos
como a antiseptina, á cal indicaban como
beneficiosa para os problemas intestinais que se sufrían tras a epidemia, ou o Jerez
Quina, presentado como “el mejor desinfectante y al mismo tiempo aperitivo”.
De igual xeito, e salvando as distancias, a sociedade actual
e a sociedade de hai un século seguen a manter certos elementos de fondo
innatos á natureza humana que facilitan a crenza en azueiras e remedios
milagrosos. Segundo os medios, os veciños das zonas limítrofes a Portugal estaban
asustados porque existía o rumor de que alí, amáis da gripe, estaban a sufrir
tamén a epidemia da varíola, o tifo e o cólera. Se ben existían conatos destas
enfermidades no país veciño, respondían a brotes semellantes aos que podía
haber na época en Galicia. Entre os remedios que se propagaron como efectivos
estivo a quinina e o iodo, produto este último que ficou a partir de entón en
moitos fogares para ser empregado para maquillarse aclarando a pel.
A inicios de 1920, a situación parecía estar normalizada ata
o punto de que os propios medios, tan recargados na estilística dos seus
relatos nesta época, abordaban o tema cun lixeiro ton humorístico con este
tema. No diario ‘La Integridad’, do 18 de xaneiro do devandito ano, escribían:
“También por aquí la gripe, aunque benigna, anda a caza de
parroquianos, obligándolos a guardar cama unos cuantos días. Mal por mal, más
nos molesta la visita de la gripe que la de los políticos. A estos se les
engaña; a la otra... sólo con caldos”.