Plan para a mellora do contorno das Bernardas

Pantón
25 Marzo 2021
Patrimonio
Redacción | 26 de marzo de 2021
Este xoves publicouse a licitación das obras de acondicionamento do paseo peonil da rúa que comunica o contorno do mosteiro de San Salvador co centro da vila de Ferreira. Servirá para completar o paseo situado fronte a este monumento actuando na rede viaria municipal. Este plan completará a posta en valor deste emblemático mosteiro cisterciense feminino que conserva aínda a vida e o culto e que ven de ver acondicionada a súa hospedería e un espazo multifuncional e divulgativo sobre a Ribeira Sacra. É Ben de Interese Cultural coa categoría de Monumento desde 1975.
A Consellería de Medio Ambiente, Territorio e Vivenda publicou na Plataforma de Contratos Públicos de Galicia a licitación das obras de acondicionamento do paseo peonil da rúa que comunica o contorno deste monumento co centro da vila de Ferreira.

Servirá para completar o paseo situado fronte ao mosteiro, enlazando o núcleo de Ferreira coa praza do Curro. Actuarase ao longo duns 770 metros que forman parte da rede viaria municipal de Pantón.

Está previsto mellorar un treito en curva que carece de beirarrúa nunha das marxes, ademais de ter un muro moi próximo á estrada que dificulta o paso dos peóns e a visibilidade para os vehículos. A cesión dunha porción de terreo por parte dun propietario permitirá derrubar o muro e dispor de espazo para construír unha beirarrúa de pedra, en concordancia coas do resto do traxecto. Posteriormente levantarase outro muro de pedra, igual que os que xa hai no tramo, para delimitar a zona.

Tamén se pavimentará a calzada con aglomerado en quente -á altura da recta fronte ao mosteiro e na praza do Curro-; e habilitaranse pasos de peóns e sinalización horizontal e vertical. Instalarase alumeado público e sistema de evacuación de augas pluviais, e levaranse a cabo as actuacións precisas para adecuar as canalizacións eléctricas e de telecomunicacións.

A finais do ano pasado a Axencia de Turismo de Galicia asinou un convenio coa Comunidade Cisterciense do Divino Salvador co fin de adquirir mobiliario para a hospedaxe no mosteiro de Santa María de Ferreira de Pantón, onde a Administración galega executou obras para acondicionar unha hospedería e un espazo multifuncional que poderá acoller información divulgativa da Ribeira Sacra e do mosteiro, declarado de Ben de Interese Cultural coa categoría de Monumento desde 1975.

Investiranse 256.200 euros e as obras teñen un prazo de execución estimado de tres meses. As empresas interesadas en presentar ofertas poden facelo ata o vindeiro 7 de abril.

 

Concello
Concello Pantón
Pantón Saber máis